Të paktën tetë persona humbën jetën, ndërkohë që 430 000 të tjerë janë detyruar të shpërngulen në nëntë rajone të Mianmarit Qendror dhe Verior, njoftoi sot Ministria e Informacionit.
Reshjet që kanë filluar që nga fundi i muajit të kaluar kanë shkaktuar përmbytje në nëntë rajone, ndërkohë që tre lumenjtë kryesorë të vendit shihen si shkaktarë të këtyre përmbytjeve.
”Rajoni më i goditur është ai i Ayeyawaddyt, ku janë shpërngulur me shumë se 210 000 persona”, tha ministria e sipërcituar.
Përmbytjet janë të zakonshme në Mianmar gjatë sezonit të musoneve.
Vitin e kaluar vdiqën 100 persona dhe u evakuan një milion të tjerë.