Autoritetet e vendit po planifikojnë ta shndërrojnë Forcën e Sigurisë së Kosovës në Ushtri. Pritet që kjo të ndodhë pas kalimit të ligjeve në Kuvendin e Kosovës. Por, a do të largohen pjesëtarët serbë që aktualisht janë në FSK apo do të pranojnë të bëhen ushtarë të Kosovës?
Presioni politik i Beogradit kishte bërë që gjatë verës së vitit 2018, shumë pjesëtarë të komunitetit serb të kërkonin largimin e tyre nga Forca e Sigurisë së Kosovës.
Një gjë e tillë kishte ngjallur edhe shqetësime tek ministri i FSK-së, Rrustem Berisha, i cili atë kohë në një konferencë për media kishte treguar se rreth 40 pjesëtarë të komunitetit serb nga 137 sa janë gjithsejtë, kishin kërkuar largim nga FSK-ja.
Tani Republika e Kosovës gjendet në prag të formimit të Ushtrisë, pasi në Komisionin për Mbikëqyrjen e FSK-së janë miratuar me shumicë votash tri projektligjet e nevojshme për shndërrimin e FSK-së në ushtri. I vetmi që kishte votuar kundër kishte qenë deputeti i Listës Serbe, Zoran Mojsilovi?.
Por a mund të ketë largime të tjera të pjesëtarëve të komunitetit serb nga FSK-ja në prag të gjithë këtyre zhvillimeve drejtë bërjes së Republikës së Kosovës me Ushtri?- Në një përgjigje zëdhënësi i ministrit Rrustem Berisha, Ibrahim Shala, ka thënë se nuk beson se diçka e tillë mund të ndodhë.
“Ne nuk kemi ndonjë informacion të tillë dhe nuk besojmë se do të ketë ndonjë valë të re largimesh të komunitetit serb nga FSK-ja”, thuhet në përgjigje.
Teksa ka folur për largimet paraprake të pjesëtarëve serb të FSK-së, Shala thotë se ata janë larguar nga presionet politike të Beogradit, dhe jo si pasojë e kushteve brenda FSK-së.
“Shërbimi në FSK është profesional dhe vullnetar. Me pjesëtarët e FSK-së të gjitha komuniteteve, kemi takime të rregullta në kuadër të planeve të punës dhe aktiviteteve. Pjesëtarët e larguar nga MFSK-ja, nuk janë larguar nga pakënaqësitë me kushtet dhe trajtimin në FSK, por janë larguar nga presioni i jashtëm që ka ardhur nga Beogradi”, ka thënë ai.
I pyetur rreth ndonjë datë të saktë rreth thirrjes së seancës për votimin e tri projektligjeve për transformimin e FSK-së në Ushtri, Shala thotë se tashmë një gjë e tillë është në duart e Kuvendit të Republikës së Kosovës.
“MFSK dhe FSK raportojnë para komisionit parlamentar për mbikëqyrje të FSK-së. Komisioni parlamentar i ka shqyrtuar që të tri ligjet për FSK-në. Është çështje e komisionit parlamentar dhe procedurave parlamentare se kur do të procedohen në Parlament”, ka përfunduar ai.
Për shndërrimin e FSK-së në Ushtri të Republikës së Kosovës është angazhuar intensivisht kryeministri i Republikës së Kosovës, Ramush Haradinaj. Ai gjatë vizitës së tij të fundit në Shtetet e Bashkuara të Amerikës është takuar edhe me Sekretarin e Departamentit të Mbrojtjes së ShBA-ve, James Mattis. Pas kthimin në Kosovë, Haradinaj në një intervistë në Pressing të T7 kishte treguar se kishte marrë miratimin e SHBA-së për transformimin e FSK-së në ushtri.
Një gjë të tillë e ka mbështetur përmes edhe Ambasada e Shteteve të Bashkuara të Amerikës në Republikën e Kosovës.
Normalisht kundër bërjes së Republikës së Kosovës me ushtri është pala serbe. Sot presidenti i Serbisë, Aleksandër Vuçiq, ka kundërshtuar transformimin e FSK-së në Ushtri të Kosovës, ndërkohë mbetet të shihet nëse do të ushtrojnë përsëri presion ndaj pjesëtarëve serb për largim nga FSK-ja.
