Skandali me listat e fryra për statusin e veteranit, çdo ditë e më shumë po ngjallë reagime të shumta.
Lidhur me këtë skandal ka reaguar edhe editori i Gazetës Kombëtare “Bota sot”, Xhevdet Mazrekaj, i cili nëpërmjet një statusi në profilin e tij në Facebook, ka publikuar disa fotografi nga lufta në Kosovë, duke shprehur habinë se si mund të kenë qenë 60 mijë ushtarë të UÇK-së.
Ai e ka krahasuar numrin prej 60 mijë ushtarëve të UÇK-së me 40 mijë ushtarë serbë që kanë kryer gjenocid në Kosovë, duke shtruar pyetjen se ku ishin këta 60 mijë ushtarë për ta mbrojtur popullin?!
Më poshtë mund ta lexoni statusin e Mazrekajt
“Si është e mundur?
Po na thonë se kanë qenë 60 mijë ushtarë të UÇK-së! Në anën tjetër, dihet se kanë qenë 40 mijë ushtarë serbë që kanë kryer dhunë e gjenocid në Kosovë.
Këta 40 mijë ushtarë serbë, kanë vrarë 20 mijë shqiptarë dhe kanë dhunuar rreth 20 mijë gra e vajza shqiptare. Ndërsa, janë dëbuar mbi një milion shqiptarë nga Kosova.
Ku ishin këta 60 mijë ushtarë për ta mbrojtur popullin?! XHM”, ka shkruar Mazrekaj në Facbook.
