Kryeministri Edi Rama ka komentuar sot debatin për shkëmbimin e territoreve mes Kosovës dhe Serbisë.
Edhe pse u tregua i kujdesshëm të mos shprehte asnjë qëndrim përfundimtar zyrtar, kryeministri nuk e përjashtoi si zgjedhje të problemit idenë e shkëmbimit të territoreve.
Por këtë ide nuk e prezantoi si qëndrim të tij, por e hodhi për debat duke cituar deklarata të Ibrahim Rugovës dhe Rexhep Qosjes.
“Ndarje te Kosoves jo, këmbim territoresh po, e ka thënë Rugova jo unë”, tha Edi Rama.
Kryeministri u shpreh se ai personalisht nuk e di se cila është zgjidhja më e mirë, por shtoi se sot Kosova, në këtë situatë nuk është në nivelin që duhet të ishte për të ardhmen e saj.
I pyetur nga gazetari Fevziu, nëse e ka lehtësuar komunikimin mes Thaçit dhe Vuçicit, Rama u shpreh?
“Nëse ka ndodhur do jetë shumë mirë, por nuk më rezulton të ketë patur nevojë”, tha Rama duke shtuar: “Nuk mund të bëj njeriun që rri larg. Kam bërë detyrat e mia dhe bëj përditë detyrat e mia”.
