OVL e UÇK-së kërkon rivlerësim të të gjithë procesit për veteranët e luftës

Aktuale

OVL e UÇK-së kërkon rivlerësim të të gjithë procesit për veteranët e luftës

Më: 17 shtator 2018 Në ora: 15:21
Foto ilustrim

Organizata e Veteranëve të Luftës së UÇK-së nëpërmjet një komunikate për media ka reaguar në lidhje me publikimin e disa listave që akuzohen si veteranë të rrejshëm.

"Organizata e Veteranëve të Luftës së UÇK-së, nuk mund të pajtohet me publikimin nga ana e mediave të listave ‚të veteranëve të rrejshëm‘  të hartuara nga ana e Prokurorisë Speciale të Republikës së Kosovës, e cila listë jo vetëm që është publikuar në kundërshtim me ligjin dhe etikën profesionale, por ka të evidentuar një numër shumë të madh të veteranëve të dëshmuar në luftë, të cilët janë futur në këtë listë pa kurrfarë kriteri. Kjo lë të kuptohet se me rastin e ngritjes së akuzës, nuk është bërë punë profesionale, duke u anashkaluar edhe vet Ligji“, thuhet në reagimin e veteranëve të luftës.

Sipas tyre kjo  akuzë që ka dalë nga ky hetim me një listë prej mbi 19 mijë  veteranëve të rrejshëm e që në fakt po dëshmohet se përmban shumë lëshime, nuk mund ta çojë këtë proces deri në fund sepse që në fillim ka kompromituar procesin.

"Prandaj, Organizata e Veteranëve të Luftës së Ushtrisë Çlirimtare të Kosovës, kërkon nga Qeveria e Republikës së Kosovës, që të fillojë  rivlerësimin e gjithë këtij procesi me anë të një Komisioni i cili do të punojë në bazë të kritereve të sakta të përcaktuara me ligjin e Veteranëve të Luftës së UÇK-së. Kjo gjë do të ishte më pak e kushtueshme dhe Prokuroria do të lirohet në punën e saj“, thuhet në reagim.

Po ashtu OVL e UÇK-së, kërkon nga Prokuroria Speciale e Kosovës, që të sqarojë opinionin se si ka ardhë deri te hartimi dhe publikimi i saj në mediat publike.

commentFirst article
Sot mund të lexoni Shfletoni kopertinat