Kryetari i Kuvendit të Kosovë , Kadri Veseli tha se votimi pro liberalizimit të vizave nga Parlamenti Evropian nuk do të ndodhte pa kryerjen e demarkacionit, prandaj subjekteve politike në vend u kërkoi konsensus nacional edhe për fazën finale me Serbinë.
Sipas tij liberalizimi i vizave është një hap shumë i merituar për qytetarët e Kosovës, dhe në muajt në vazhdim u zotua se do të punojnë që brenda këtij viti qytetarët të lëvizin lirshëm.
Veseli: Brenda vitit do lëvizim lirshëm
“Ne jemi perëndimor, ne jemi evropian, ne do të vazhdojmë rrugëtimin tonë me hapa të sigurt drejt Bashkimit Evropian. Jam i sigurt se ky vendim sot i Parlamentit Evropian do të pasoj edhe me vendimin përfundimtar të Këshillit të Ministrave që në muajin e ardhshëm të kemi edhe vendimin definitiv që qytetarët tanë të lëvizin lirshëm brenda këtij viti, kjo është edhe një qëndrim për çka Kuvendi i Republikës së Kosovës së bashku me të gjitha grupet parlamentare, kemi lobuar ka disa muaj për çka i falënderoj edhe të gjithë kolegët parlamentar”, u shpreh Veseli.
Kreu i Kuvendit, potencoi se pa konsensus nacional nuk do të mund të ishte kryer çështja e lëvizjes së lirë, prandaj kërkoi që të bashkuar të jenë edhe për fazën finale të dialogut me Serbinë.
Veseli: Bashkërisht duhet të jemi edhe për fazën finale të dialogut
“Ende ka shumë punë për tu bërë do të ecim bashkërisht...Sot ky vendim për liberalizimin e vizave nuk do të ishte i mundur pa e pasur konsensusin e përbashkët nacional, pa punuar bashkërisht, pa e kryer çështjen e demarkacionit duhet të jemi shumë të vetëdijshëm për këtë fakt, në të njëjtën formë ne duhet të jemi bashkërisht edhe në procesin që lidhet po ashtu me liberalizimin e vizave, po ashtu në fazën finale të dialogut”, tha Veseli.
Ndryshe, sot Parlamenti Evropian ka votuar për liberalizimin e vizave për Kosovën, 420 deputetë kanë votuar për liberalizimin e vizave ndërsa 186 ishin kundër dhe 20 kanë abstenuar,.
Tani radhën për të votuar këtë rekomandim e ka edhe Këshilli i Ministrave të BE-së.