Punëtorët e Postës kanë paralajmëruar për nesër protesta para Qeverisë së Kosovës për shkak të mos reflektimit të institucioneve drejt kërkesave të tyre.
Sindikata e Punëtorëve të Postës thotë se në këtë gjendje kanë ardhur për shkak të krizës financiare dhe mungesës së Bordit të Postës, të cilit i ka kaluar mandati javën e kaluar.
Kërkesat e punëtorëve të postës drejtuar Qeverisë së Kosovës janë që Qeveria e Kosovës të kryejë urgjentisht obligimin ligjor ndaj Postës – rimbursimin e humbjeve në Shërbimin Universal Postar, Qeveria t’i mundësojë Postës të marrë shërbimet që i ka secili operator postar në rajon dhe më gjerë - pensionet dhe skemat e ndryshme sociale, shpërndarja e faturave për shërbime publike si dhe themelimi i Post-Bankës-, realizimi i pagave për të gjithë punonjësit e Postës së Kosovës.
Kryetari i Sindikatës së punëtorëve të Postës së Kosovës, Etrit Hoti për KosovaPress ka thënë se protestat nuk do të ndërpriten deri në realizimin e kërkesave.
Hoti: Nesër në ora 11:00 protestojmë para Qeverisë së Kosovës
“Sot jemi në ditën e tretë e cila ka vazhduar duke pritur reflektim të realizimit të kërkesave tona drejtuar institucioneve të vendit... Ka mbajtur një takim kryesia e sindikatës dhe pas shqyrtimit të gjendjes në Postën e Kosovës në terren dhe në mesin e kolegëve tanë ka marr vendim që nesër në ora 11:00 të protestohet para Qeverisës së Republikës së Kosovës me kërkesën e vetme përmbushjen e detyrimeve ligjore që i kanë ndaj Postës”, u shpreh ai.
Hoti ka kërkuar reflektim sa më të shpejtë nga Qeveria e Kosovës për gjendjen e krijuar në këtë ndërmarrje publike.
Sipas tij, problem kryesor që tani punëtorët e Postës e kanë është mungesa e Bordit në këtë institucion.
Ai tha se konkursi për bordin e ri tani është i hapur dhe presin që të anëtarët e rinj të zgjidhen ashtu siç e parasheh ligji.
Hoti: Kemi ardhur në një situatë kur nuk kemi as bord
“Problemi kryesor e kemi që momentalisht bord nuk ka, bordit i ka kaluar mandati javën e kaluar siç jeni njoftuar është shpallur konkursi për bordet e reja... Do të ishte sa më mirë që të zgjidhet bordi i ri, realisht kisha pas punë me bord, mirëpo tani kemi ardhur në një situatë nuk kemi bord, nuk kemi kurrgjë. Situata është konfuze sepse bordin e bie aksionari, bordi e përfaqëson Qeverinë, kështu që Qeveria duhet ta gjejë një zgjidhje”, ka thënë ai.
Kryesindikalisti i Postës së Kosovës, Etrit Hoti ka deklaruar se e kanë mbështetjen e menaxhmentit të Postës së Kosovës për veprimet e tyre, por që sipas tij për realizimin e kërkesave të tyre nuk po ka vullnet politik.
Hoti: Menaxhmenti i ka kryer procedurat drejt kërkesave tona
“Kryeshefi apo menaxhmenti ekzekutiv i kanë kryer të gjitha procedurat e veta të cilat u takojnë me ligj, kanë kërkuar e kanë paraqitur gjendjen që është e keqe, i kanë kërkuar tek aksionari mbulimin e shërbimit universal postar, i kanë kërkuar skemat pensionale ministrisë, kanë kërkuar që të bëhet Postë sikurse në rajon , mirëpo nuk e di se ku ka ngecur ndoshta nuk ka vullnet politik”, tha ai.
Punëtorët e Postës së Kosovës janë në grevë që nga dita e hënë, ndërsa me kërkesa të njëjta patën mbajtur grevë njëorëshe edhe në muajin korrik.