Kishte marr kërcënime për intervistimin e tij, reagon Kadri Veseli, sulmon ashpër prokurorin Blakaj

Aktuale

Kishte marr kërcënime për intervistimin e tij, reagon Kadri Veseli, sulmon ashpër prokurorin Blakaj

Nga: P.R Më: 20 gusht 2018 Në ora: 21:14
Kadri Veseli dhe Elez Blakaj

Ish prokurori i Prokurorisë Speciale, Elez Blakaj, në letrën e tij me arsyet e largimit nga posti i tij, kishte përmendur edhe kërcënimin që kishte marr nga kryeprokurori i shtetit, Aleksandër Lumezi, pas intervistimit të kreut të Kuvendit, Kadri Veseli.

E përmes një postimi në facebook, ka reaguar edhe vet Kadri Veseli. Ai ka sulmuar prokurorin Blakaj, për të cilin thotë se e dëshmoi se nuk e do shtetin e tij.

“Me deklarata nga SHBA-ja nuk luftohet krimi, për aq sa lufta nuk është fituar me deklarata pa marrë pjesë drejtpërdrejt. Sido që të jetë, ky është morali të cilin e zgjedh vetë individi, më të cilin i edukon edhe fëmijët e vet. Ky proces do të shkojë deri në fund, për aq sa do të shkojë në fund edhe çdo pretendim që ka bërë ky prokuror. Listat do të hetohen. E vërteta do të dalë. Shteti i Kosovës i kishte besuar z.Blakaj dhe profesionalizmit të tij. Me ikjen e tij, ai tregon se nuk e do shtetin e Kosovës”, shkruan ndër tjerash Veseli, përcjellë “Bota sot”.

Ky është postimi i plotë:

Që ka fryrje të listave të veteranëve të Ushtrisë Çlirimtare të Kosovës, nuk ka asnjë dilemë. Një shqetësim i tillë më është shprehur nga shumë bashkëluftëtarë, gjë që më ka bërë edhe mua të kërkoj deri në fund hetimin e këtij procesi.

Kam kërkuar qysh në fillim që për këtë drejtësia ta thotë fjalën e saj. Çdo pretendim për mashtrime në listat e veteranëve duhet të hetohet në mënyrë të plotë dhe të paanshme.

Me vjen keq për luftëtarët e UÇK-së, që dikush po tenton të njollosë kontributin dhe sakrificat e tyre. Por, edhe këtë betejë, të mbrojtjes së vlerave të luftës sonë, bashkëluftëtarë, do ta fitojmë, duke vendosur para drejtësisë, me emra dhe mbiemra, të gjithë ata që kanë hyrë në këto lista pa qenë luftëtarë të lirisë.

Në këtë betejë duhen njerëz të përkushtuar dhe të guximshëm në çdo institucion.

Elez Blakaj, një prokuror që shteti i Kosovës ia kishte dhënë besimin, nuk pati guximin që këtë gjë ta çojë deri në fund, për çka e ka pasur mbështetjen time të plotë - si njeri, si luftëtar dhe si lider institucional e politik.

Ai kishte menduar të bëhej prokuror hero pa e luftuar krimin, ashtu sikurse këta mashtrues që duan të bëhen veteranë pa pjesëmarrje në luftën çlirimtare.

Me deklarata nga SHBA-ja nuk luftohet krimi, për aq sa lufta nuk është fituar me deklarata pa marrë pjesë drejtpërdrejt. Sido që të jetë, ky është morali të cilin e zgjedh vetë individi, më të cilin i edukon edhe fëmijët e vet.

Ky proces do të shkojë deri në fund, për aq sa do të shkojë në fund edhe çdo pretendim që ka bërë ky prokuror. Listat do të hetohen. E vërteta do të dalë.

Shteti i Kosovës i kishte besuar z.Blakaj dhe profesionalizmit të tij. Me ikjen e tij, ai tregon se nuk e do shtetin e Kosovës.

Prokurorët që e duan shtetin e Kosovës, që jetojnë me shpirt në këtë vend, do ta përfundojnë këtë proces.

Ikja e Elez Blakajt nga detyra, nuk duhet të jetë aspak dekurajim për njerëzit e këtij vendi, sidomos për profesionistët e drejtësisë.

Siguroj qytetarët e Kosovës se mashtruesit e çdo lloji, as nuk do të mund ta njollosin emrin e lavdishëm të Ushtrisë Çlirimtaren të Kosovës dhe as nuk do të mund ta dëmtojnë të ardhmen e Kosovës.

commentFirst article
Sot mund të lexoni Shfletoni kopertinat