Duhej të ishin thjesht ditë të nxehta vere, por Ballkani është ndezur krejt papritur.
Serbët në Kosovë kanë paralajmëruar se do shpallin autonominë dhe diçka e tillë ka alarmuar autoritetet e Kosovës që kanë dërguar forca sigurie shtesë në veri.
Presidenti i Serbisë, Aleksandër Vuçiç thotë se Serbia do të mbrojë serbët.
Kurse homologu i tij, Hashim Thaçi shprehet se, Kosova mund të kërkojë që Lugina e Preshevës të bashkohet me vendin e tij, por pa shkëmbyer territore.
Interesant është se disa media të huaja shkruanin para disa kohësh se Vuçiç dhe Thaçi po negociojnë zgjidhjen e çështjes së Kosovës mes tyre pa ndërhyrjen e SHBA ose BE.
A është ky një testim i situatës apo diçka e vërtetë?
Fakt është se ish-kryeministri Sali Berisha tha të shtunën se ka pritur drejtues të lartë të Luginës së Preshevës, ku ka kundërshtuar idenë e Thaçit për ndryshim kufijsh.
Kurse Thaçi është përgjigjur mjaft ashpër duke mos e përmendur emrin e Berishës, por duke nënkuptuar ndaj tij disa akuza që kanë qarkulluar vazhdimisht në rrjet si ajo qe ka ndihmuar Millosheviçin me naftë apo që ka strehuar Bin Ladenin apo Arkanin.
Temperaturat e larta politike në rajon janë pasqyruar nga agjencia e rëndësishme gjermane DPA.
Ajo shkruan se Ballkani rrezikon një valë të re dhune.
Sipas saj, vëzhguesit janë të shqetësuar nga zhvillimet e fundit në Kosovë.
Agjencia shkruan se shpërthimi i ri i dhunës do kishte pasoja të paparashikueshme.