(E plotësuar) - Presidenti i Kosovës Hashim Thaçi, ka ritheksuar edhe një herë se marrëveshja përfundimtare mes Kosovës dhe Serbisë do të jetë e rënd dhe e dhimbshme.
Por, nuk ka sqaruar fort se pse do të jetë e tillë, ani pse ka vazhduar të thotë se kjo marrëveshje është e nevojshme për të ecur përpara drejt integrimeve euroatlantike dhe njohjes së Kosovës nga Serbia.
Gjatë një bashkëbisedimi të gjatë me studentë të Universitetit të Prishtinës, kreu i shtetit nuk ka dashur të komentojë deklaratat e ambasadorit amerikan Greg Delaëie i cili ka folur për shkëmbimin e territoreve.
Por, kreu i vendit i pyetur nëse shkëmbimi i territoreve do të jetë pjesë e marrëveshjes përfundimtare dhe nëse kjo do ta bëjë të rëndë marrëveshjen, Thaçi i ka ikur përgjegjës konkrete duke thënë se marrëveshja do të jetë në koordinim të plotë me SHBA-të.
Thaçi: Marrëveshja përfundimtare do të jetë e koordinuar me SHBA-të
“Uroj të mos jetoj atë kohë kur SHBA deklarohet se heq mbështetjen dhe nuk do të ndodh kjo, por mos të ekzagjerojmë se nuk është panikë. Ajo që është me rëndësi është kjo, partneritetin dhe miqësinë me SHBA-në duhet ta kultivojmë si vlerë nga të gjithë edhe gjeneratat e ardhshme. Çdo herë këshillat, sugjerimet e SHBA-ve kanë qenë të mirëseardhura për ne. Mendoj dhe vlerësoj se edhe deklarimi i sinqertë dhe shumë i përgjegjshëm i ambasadorit të SHAB-ve, megjithëse nuk do doja t’i komentoja, duhet të merren seriozisht nga të gjithë pa dallim...Një gjë ju siguroj, marrëveshja përfundimtare do të jetë e dakorduar plotësisht me SHBA-të dhe BE-në. Vetëm kjo garancë është besim për neve që mund të përmbyllim suksesshëm këtë proces”, tha Thaçi.
Presidenti Thaçi ka insistuar se marrëveshja do të jetë mes dy vendeve të pavarura dhe sovrane.
Mirëpo, për të gjitha, kreu i vendit ka thënë se beteja zhvillohet në fushë e jo duke qëndruar si spektatorë dhe duke akuzuar të tjerët.
Thaçi: Marrëveshja do të jetë e rëndë, por beteja zhvillohet në fushë
“Beteja zhvillohet në fushë, jo vetëm me qenë spektator, por zhvillohet në tavolinë. Me së lehti është të akuzosh Thaçin, atë apo këtë, se po ulësh me përfaqësuesit serbë. Por të gjithë janë ulur dikush më herët dikush më vonë, mua me ka rënë pak me gjatë por mbaj përgjegjësinë time edhe kushtetuese edhe ligjore. Prandaj nëse ne arrijmë marrëveshje, që do të jetë shumë e rëndë, atëherë Kosova lëvizë shpejt për anëtarësim në NATO dhe perspektivë konkrete evropiane”, u shpreh Thaçi.
Studentët kanë pyetur presidentin Thaçi nëse marrëveshja me Serbinë do të sjellë për Kosovën të mira në aspektin e zhvillimit ekonomik, të cilët presidenti iu tregoi se do të organizohet një konferencë e donatorëve pas marrëveshjes përfundimtare.
Thaçi: Pas marrëveshjes do të organizohet një konferencë e donatorëve për Kosovën
“Mendohet që të organizohet një konferencë e donatorëve pas arritjes së marrëveshjes Kosovë-Serbi, për Kosovën por edhe për Serbinë, ku Kosova do të jetë përfituese shumë e madhe që pastaj do të vazhdohet edhe me zhvillim ekonomik dhe me plane konkrete zhvillimore që do të jenë drejtpërdrejt ndikim në rritjen e mirëqenies sociale të qytetarëve”, theksoi ai.
Kreu i shtetit ka folur edhe për liberalizimin e vizave, duke iu thënë studentëve se do tani është krijuar mundësi e mirë që të rinjtë të kenë mundësi të dalin në Evropë për të studiuar.
Për të parin e vendit nga vendimi i Komisionit Evropian, për liberalizimin e vizave është përfituese Kosova dhe qytetarët e saj dhe askush individualisht.
Thaçi: Me liberalizimin e vizave përfitues janë gjithë
“Përfitues janë të gjithë, nuk është përfituese një gjeneratë, nuk është përfituese një adresë politike, këtu ka veç fitues për Kosovën, dhe këtu duhet të ndihen mirë dhe krenar të gjithë. Tash, këta janë bartësit e institucioneve dhe nuk mund të ndërrohen. Mendoj që në këtë proces historik evropian, duhet të jenë pozitiv të gjithë për vendin dhe në asnjë rrethanë mos ta marrim shembullin e keq të ndonjë fqinji që shkon në Bruksel dhe e shanë vendin e vet për xhelozi politike”, u shpreh kreu i shtetit.
Presidenti Thaçi ripërseriti se ai shpreson që deri kah viti i ri qytetarët e Kosovës do të lëvizin pa viza.
E përsërit Thaçi: Marrëveshja me Serbinë do të jetë shumë e vështirë dhe e dhembshme
Presidenti i Kosovës, Hashim Thaçi gjatë bashkëbisedimit me studentë të UP-së, foli edhe për procesin e dialogut me Serbinë, duke e quajtur si proces shumë të vështirë.
Ai tha se marrëveshja me Serbinë do të jetë e vështirë dhe e dhimbshme.
“Do të jetë marrëveshje e vështirë dhe e dhimbshme. Ne me kompromise kemi arritur shumë. Mbi bazat e kompromisit kemi ecur edhe në Vjenë. Nuk do të jetë betejë se kush kë do ta mund. Synimi është që do të jetë një marrëveshje që palët do të ndihen të dinjitetshme. Kosova nuk guxon të marrë përgjegjësinë e dështimit të dialogut”, shtoi Presidenti, pas pyetjeve të studentëve.
Thaçi tha se do që sa më shpejt që është e mundur të kemi njohje nga Serbia.
Thaçi deklaroi se sipas parashikimeve të BE-së dhe SHBA-ve, marrëveshja me Serbinë mund të arrihet pas 4-6 muajve.
“Jam i gatshëm të rri natë e ditë në tavolinë dhe të diskutoj me Serbinë, por nuk e dua asnjë minutë luftë, as të shoh apo të dëgjoj për asnjë viktimë qoftë shqiptar apo serb”, tha presidenti.
Thaçi u ballafaqua për disa minuta me gazetarët të cilët e pyetën se a do të ketë shkëmbim territoresh me Serbinë.
“Lexoni mirë se çka kanë thënë. Mos predikoni. Marrëveshja do të jetë në mes të vendeve të pavarura dhe sovrane. Unë mendoj që të ndodh pajtimi, por nuk duhet të jetë i njëanshëm. Do të jetë i rëndë. Ne jemi fqinj, nuk mund ta zhvendosim njëri-tjetrin. Mendohet që marrëveshja të jetë mes dy vendeve të pavarura dhe sovrane dhe të ndodh njohja nga Serbia. Nuk do të lejojmë që të ndodh një marrëveshje tjetër e përkohshme. Nuk është hera e parë që po ndodhin marrëveshje të tilla. Do ta theksoj qartë, marrëveshja do të jetë në nivel, njohje formale dhe vazhdimin e Kosovës për anëtarësim në organizata ndërkombëtare”, tha Thaçi.
