“Hajde bac hajde” - komunikimi mes pjesëtarëve të delegacionit të Kosovës në prani të Mogherinit

Aktuale

“Hajde bac hajde” - komunikimi mes pjesëtarëve të delegacionit të Kosovës në prani të Mogherinit

Më: 18 korrik 2018 Në ora: 19:10
Delegacioni i Kosovës në Bruksel

Në prag të takimit me Federica Mogherinin, delegacioni i Kosovës që udhëtoi në Bruksel të martën realizoi një fotografi me përfaqësuesen e lartë të Bashkimit Evropian.

Para se të zinin vendet për fotografinë e përbashkët, disa nga anëtarët e delegacionit të Kosovës ngurruan të dilnin në pjesën ku po qëndronte Mogherini. E në këtë situatë filloi një komunikim i pazakontë mes tyre; një komunikim jozyrtar me nofka.

Kryeparlamentari Kadri Veseli e ftonte Behgjet Pacollin që t’i bashkohej atij dhe Mogherinit në podium, teksa i drejtohej atij si “bac”.

“Hajde bac! Hajde bac hajde”, i thoshte Kadri Veseli, ministrit të Jashtëm Behgjet Pacollit në prani të Mogherinit.

Ndërkaq, presidenti Thaçi i drejtohej delegacionit të Kosovës ku bën pjesë edhe ai vet, si: “Kosovo Family” dhe i ftonte ata për të realizuar një fotografi duke thënë: “Hajde Family”.

Në anën tjetër, kryeministri Ramush Haradinaj ishte fiksuar pas një simboli të flamurit të Kosovës që e mbante në uniformën e tij. Këtë simbol, ai ia tregoi fillimisht Mogherinit.

“Më lë që ta fokusoj flamurin e Kosovës”, i tha Haradinaj, Mogherinit. Derisa pas realizimit të fotografisë, Haradinaj tha se herën tjetër do ta merrte një flamur të vogël të Kosovës për ta mbajtur në duar.

I gjithë ky bashkëbisedim mes pjesëtarëve të delegacionit të Kosovës dhe Federica Mogherinit është inçizuar nga kamera e Zërit të Amerikës, pak para se të fillonte takimi mes dy palëve.

commentFirst article
Sot mund të lexoni Shfletoni kopertinat