Më 18 korrik përfaqësuesit e shtetit do ta takojnë Frederica Mogherinin, Përfaqësuesen e Lartë të Bashkimit Evropian.
Lajmin e ka konfirmuar edhe zëvendëskryeministri dhe ministri i Diasporës, Dardan Gashi.
“Do të takohemi me Mogherinin që të dakordojmë hapat e mëtutjeshëm për dialogun me Serbinë, gjithashtu do të konfirmojmë përkushtimin tonë për këtë proces”.
“Në të njëjtën kohë do të njoftohemi drejtpërdrejt nga Mogherini se cilët janë planet dhe hapat për zhvillimin e dialogut”.
Në këtë takim do të marrin pjesë, Presidenti Hashim Thaçi, Kryetari i Kuvendit, Kadri Veseli, Kryeministri Ramush Haradinaj, zëvendëskryeministri i parë dhe Ministër i Jashtëm, Behgjet Pacolli, zëvendëskryeministri Fatmir Limaj dhe zëvendëskryeministri dhe Ministër për Diasporë dhe Investime Strategjike, Dardan Gashi.
Gashi ka ftuar edhe opozitën që të bëhen pjesë e këtij procesi, ndërsa ka thënë se gjatë takimeve që kanë zhvilluar nuk ka pasur kundërshtime, por vetëm diskutime sipas tij për këtë temë të ndjeshme.
Ai në Info Magzine ka thënë se dokumenti i dalë në media për hapat e mëtutjeshëm të dialogut nuk është ai zyrtari dhe se nuk e kanë trajtuar si të tillë.
