Deputeti i Kuvendit të Kosovës, Mërgim Lushtaku, i cili punon edhe në Ndërmarrjen ‘Ibër Lepenc’, ka kohë të merret edhe me katër biznese në të cilat ai është aksionar.
Mërgimi që është djali i ish Kryetarit të Skenderajt, Sami Lushtaku, si duket ende nuk ka trashëguar pasurinë e babait pasi nuk ka deklaruar pasuri të paluajtshme në Agjencinë Kundër Korrupsionit.
Në deklarimin e pasurisë së tij, Lushtaku thotë se ka një veturë ‘Mercedes B180’ në vlerë prej 18 mijë euro.
Ai poashtu, ka deklaruar 45 mijë e 500 euro para të gatshme në bankë, shtuar kësaj bashkëshortja e tij ka 12 mijë e 500 euro në bankë.
Lushtaku paraqitet aksionar 40, 50 dhe 100 përqind respektivisht në katër biznese: ‘AIM’, ‘Ferma Jonë’, ‘Virtyti Sh.p.k.’, dhe Koni Projekt sh.p.k..
Kapitali i përbashkët i këtyre bizneseve përshkruhet rreth 7 mijë euro.
Deputeti ka të ardhura të ‘majme’ mujore duke marrë pagë nga Kuvendi i Kosovës në vlerë prej 8 mijë e 248 euro në vit, pastaj një pagë tjetër prej 2 mijë e 730 euro në vit dhe një honorar nga ‘Ibër-Lepenci’ prej 4 mijë e 326 euro në vit.
Në sektorin e detyrimeve, Lushtaku thotë se ka investuar 26 mijë e 500 euro në kompaninë ‘Koni Projekt’.