(E plotësuar) - Seanca e Kuvendit të Kosovës po vazhdon me interpelancën e kryeministrit për Telekomin dhe Postën, ku u tha se kryekrimineli i Telekomit është Agron Mustafa, derisa në Postë një person që ka punuar sigurim, sot është bërë drejtorit për hetime dhe anti korrupsion.
Kryetari i Lëvizjes Vetëvendosje, Albin Kurti u ndal te punësimi në Postë.
Kurti: Roja është bërë drejtor për hetime dhe anti korrupsion në Postë
“Një person që fillon me shkronjën G është person real. Ai ka pozitën e drejtorit për hetime dhe anti korrupsion në Postë. Personi G është punësuar në vitin 2003 si roje, si sigurim dhe ka qenë vetëm me shkollë fillore si sigurim. Prej vitit 2003 ia kanë kryer dhe edhe shkollën e mesme edhe fakultetin“, tha ai.
Deputeti i Nismës Socialdemokratike, Milaim Zeka tha se kryekrimineli që e ka fundos Telekomin është Agron Mustafa.
Zeka: Agron Mustafa ka bërë kontrata fiktive
“Ky Agron Mustafa e ka fut 3 G dhe 4 G në antenat të cilat fare nuk janë në ato dimensione. Agron Mustafa ka bërë kontrata fiktive me portale inekzistente për të vjedhur para në xhep të vetin. Post Telekomi i Kosovës ka nënshkruar kontratat me qytetarët nëpër oborre të tyre, ia kanë dhënë 300 euro por i kanë marrë 3000 mijë euro. Këta mafioz e kanë bërë Postë Tekelomin e Kosovës, valën 900 si një lopë që mbahet prej një fshatari dhe qumështin ia ka dhënë Z-Mobile dhe IPKO-s”, tha ai.
Kurse, kryeministri Haradinaj tha se nuk do të jetë lehtë të dilet nga gjendja e mbrapsht në Telekom dhe siç po shkon trendi, mos thuani që e bankrotoi Qeveria, pasi të gjithë duhet të punojnë për ta hequr nga kriza Postën dhe Telekomin e Kosovës.
Haradinaj: Parlamenti dhe Kosova duhet t’i marrë do rreziqe për Telekomin
“Ky Parlament dhe Kosova duhet t’i marrë do rreziqe për Telekomin, sa i përket Postës mendojë që me pak vullnet të mirë kishim pas mundësi me kthyer në kompani profitabile, ata kanë kërkuar shërbimet e post bankës me sa kam dëgjuar prej tyre. Nëse në të ardhmen kjo kompani lehet në stuhi kështu, sigurt e kemi jo vetëm falimentim por do të kemi probleme me bllokim të xhirollogarive, bllokim të aseteve, do të humbim jo vetëm në financa si Kosovë por mund të humbim edhe në patundshmëri dhe të drejta tjera që nuk do të ishte mirë t’i ndodhte Kosovës ashtu“, ka thënë ai.
Përndryshe, LDK dhe Lëvizja Vetëvendosje ka përgatitur një rezolutë lidhur me Telekomin dhe Postën e Kosovës.
***
Kreu i Lëvizjes Vetëvendosje, Albin Kurti, duke folur në Kuvendin e Kosovës për gjendjen e Postës dhe Telekomin e Kosovës, ka përmendur një shembull konkret punësimi në këtë kompani.
E ka quajtur tragjedi rastin e zyrtarit që ai i është referuar si personi G, në bazë të shkronjës së parë të emrit të tij, e që tash është në pozitën e hetuesit e antikorrupsionit.
“Ky person, është punësuar në PTK në vitin 2003, si roje, sigurim. Kur është punësuar e ka pasur të kryer vetëm shkollën fillore. Pra në ndërkohë ia kanë kryer edhe shkollën e mesme edhe fakultetin dhe e kanë graduar në pozitën e zyrtarit për hetim e antikorrupsion”, ka thënë Kurti.
“E tregojnë një anekdotë të vërtetë për të. Në ditën e parë të punës ishte vonuar, sepse kur kishte ardhur nga një rajon i Kosovës nuk kishte zbritur në lokacionin e duhur. E kishte thirrur në panik punëdhënësin e tij se ‘po vonohem pak, sepse autobusi më ka dërguar në Llap’. Kur ai e kishte pyetur se si në Llap, ai ishte përgjigjur se ka zbritur diku dhe kur i ka pyetur kalimtarët se ku është i kanë thënë te Xhamia e Llapit’”, ka thënë Kurti.
Sipas Kurtit, personi G nuk ka faj.
“Ai ka qenë me shkollë fillore në vitin 2003. Buzë ekzistencës. Që 15 vjet urdhërdhënësit e tij e mbajnë të kontrolluar atë”, ka thënë Kurti.
