Presidenti Hashim Thaçi ka thënë se konsensusi politik dhe uniteti qytetar janë veprime esenciale për të ardhmen e Kosovës.
Me këtë rast ai ka mirëpritur tri nisma të cilat së fundi u morën nga liderët e partive politike në vend: platformën e qeverisë së Ramush Haradinajt për dialog me Serbinë, platformën për konsensus të kreut të PDK-së, Kadri Veseli, si dhe tryezën e sotme të partive politike të thirrur nga kryetari i LDK-së, Isa Mustafa.
Sipas Thaçit, që të gjitha këto janë në shërbim të unitetit qytetar.
Pa ndërhyrje reagimi i Thaçit:
Konsensusi politik dhe uniteti qytetar janë veprime esenciale për të ardhmen e Kosovës. Në shërbim të kësaj, e mirëpres platformën për dialog ndërmjet Republikës së Kosovës dhe asaj të Serbisë, të prezantuar nga kryeministri i Qeverisë së Republikës së Kosovës, Ramush Haradinaj.
Gjithashtu është inkurajuese platforma politike e cila përfshin pika të rëndësishme te agjendës shtetëror e prezantuar nga kryetari i Kuvendit të Kosovës, Kadri Veseli.
Në kontekst të këtyre iniciativave përshëndes tryezën e sotme politike, të thirrur nga kryetari i Lidhjes Demokratike të Kosovës, Isa Mustafa.
Është inkurajues takimi i sotëm i partive politike për të përafruar qëndrimet dhe për ta institucionalizuar agjendën shtetërore.
Konsensusi i gjerë politik është garancia ma e mirë për të përmbushur agjendën shtetërore, e cila si synim ka arritjen e objektivave euroatlantike të Kosovës.