Ministri i Kulturës Kujtim Gashi ka dërguar një telegram ngushëllimi familjes së aktorit nga Gjakova Art Kurti, i cili u gjet i vdekur sot në mëngjes në një veturë në fshatin Goden.
Gashi në telegramin e tij ka shkruar se bota e artit ka humbur një prej aktorëve të rinj më të talentuar.
E nderuara familja Kurti, Lajmin për vdekjen e parakohshme e të dashurit tuaj, Artit, aktorit tonë të mirënjohur, e morëm me pikëllim të madh. Bota e artit ka humbur një prej aktorëve të rinj më të talentuar.
Arti u nda nga kjo jetë në moshë të re, duke lënë në gjysmë rrugëtimin e tij prej artisti. Ai me punën e tij, bëri që të jetë i respektuar në botën e artit e të kulturës por edhe jashtë saj. Me entuziazmin e tij prej të riu ai do të jepte kontribut të madh andaj Arti do të na mungojë.
Ndarja e hershme e Art Kurtit, është humbje e rëndë jo vetëm për ju, familjen dhe miqtë, por është humbje dhe do të jetë mungesë e madhe për artdashësit dhe të gjithë ata që e njohën.
Ngushëllime familjes, miqve dhe dashamirëve të Art Kurtit. Sinqerisht, Kujtim Gashi Ministër i Kulturës, Rinisë dhe Sportit.
