Kryetari i Komunës së Gjakovës, Ardian Gjini ka shprehur dhimbje të thellë për vdekjen e kolegut të tyre, dhe aktorit Art Kurti.
“Jam i shokuar nga lajmi që kolegu ynë Art Kurti nuk është më me ne. Kolegët e mi dhe unë ndjejmë dhimbje të thellë për këtë humbje. Largimi kaq i hershëm dhe i papritur i Artit, nga familja dhe të gjithë ne do të jetë vështirë i përballueshëm”, ka shkruar Gjini, duke u shprehur ngushëllimë familjes, kolegëve dhe miqve të Kurtit.
Kurti i cili ishte aktor dhe këshilltar për rini në zyrën e Gjinit, dyshohet se ka kryer vetëvrasje.
Policia e Kosovës ka konfirmuar se po heton rrethanat për vetëvrasje, në rastin e aktorit nga Gjakova, i cili u gjet i vdekur me një plumb në kokë në një veturë në fshatin Goden, në periferi të qytetit.
“Dyshimet e para çojnë për vetëvrasje. Në veturë është gjetur vetëm një armë dhe viktima ka pasur një fishek të shkrepur në kokë”, ka thënë komandanti i Policisë në Gjakovë, Kristë Gjoka.
