Republika e Kosovës po hap sot një kapitull të ri sa i përket përmirësimit të planifikimit hapësinor në të gjithë territorin e saj.
Kështu tha sot ministrja e Mjedisit dhe Planifikimit Hapësinor, Albena Reshitaj pas nënshkrimit të vendimit për fushën e planifikimit hapësinor, i cili merret për herë të parë në Kosovë.
Ajo ka thënë se harta zonale është një dokument i rëndësishëm që ka për qëllim rritjen, e cilësisë së jetës së qytetarëve, zhvillimin e të gjitha rajoneve dhe sektorëve zhvillimor e hapësinorë.
Reshitaj: Harta zonale një nga dokumentet kryesore për planifikim hapësinor
“Harta zonale është një nga dokumentet kryesore sa i përket planifikimit hapësinor në nivelin qendrorë, me të cilin përcaktohen zonat në të cilat do të vendosen aktivitetet, veprimet dhe kushtet për zhvillimin e ardhshëm hapësinorë për të gjithë territorin e Republikës së Kosovës. Qëllimi i hartimit të hartës zonale të Republikës sonë, është rritja e mirëqenies, rritja e cilësisë së jetës së qytetarëve, si dhe një zhvillim i ekuilibruar i të gjitha rajoneve dhe sektorëve zhvillimore hapësinorë”, theksoi Reshitaj.
Pjesë e procesit të hartimit të dokumentit, sipas ministres së MMPH-së, do të jetë Grupi punues ndërministror, i cili do të nxjerrë pastaj konkluzionet dhe do të vazhdon me planifikimin e kësaj harte zonale të nivelit qendror.
Reshitaj: Paralelisht për krijimin e hartës zonale, përgjegjës janë edhe komunat
“Paralelisht me krijimin e hartës zonale të gjithë Republikës së Kosovës, janë duke u krijuar edhe hartat zonale zonale të komunave për të cilat përgjegjës janë komunat e të gjithë Republikës së Kosovës. Ne jemi duke i monitoruar dhe duke përcjellë punën e tyre”, pohoi ajo.
Për sa i përket nderimeve pa leje në Prishtinë, që janë rreth 46 mijë, Reshitaj ka thënë se me procedimin e Projektligjit për trajtimin e ndërtimeve pa leje, do të bëhen ndryshime konkrete për trajtimin e planifikimit hapësinorë apo planifikimit urban në këtë rast.
Reshitaj: Po presim të miratohet projektligji për trajtimin e ndërtimeve pa leje
“Jemi dëshmitarë okularë të asaj se çfarë ka ndodhur me ndërtimet në të gjitha vendet e urbane, ekskluzivisht në kryeqytet. Me procedimin e draft ligjit për trajtimin e ndërtimeve pa leje, andaj, mendoj që në jemi fut në një fazë tjetër dhe në një ndryshim konkret sa I përket trajtimit gjegjësisht planifikimit hapësinorë apo planifikimit urban në këtë rast. Në presim që ky ligj të implmementohet dhe të futet në fuqi, presim leximin e dytë në kuvend dhe pastaj jemi të gatshëm të fillojmë me implementimin. Ligji për trajtimin ndërtimeve pa leje jep mundësi që të legalizohen një numër i madh i ndërtimeve, të cilat janë ilegale”, ka theksuar ministrja Reshitaj.
Kostoja e kësaj harte zonale, e cila përfshinë edhe katër komunat veriore të Kosovës, është ende e paqartë, pasi procesi do të zgjasë një vit e gjysmë, ndërkohë që 22 komuna janë në proces të krijimit të hartës zonale. Ministrja Reshitaj ka thënë se pesë komuna kanë pasur fatin të gjejnë donatorë për këtë projekt.