Lëvizja Vetëvendosje përmes një deklarate për media kërkon lirimin e shtatë deputetëve të kësaj partie, të cilët u arrestuan dje për shkak të hedhjes së gazit lotsjellës në shenjë proteste ndaj miratimit të demarkacionit.
Vetëvendosje konsideron se marrëveshja e miratuar dje nga ligjvënësit kosovarë ia fal 8.200 hektarë Malit të Zi dhe ia zgjat jetën Qeverisë Haradinaj ‘për pak kohë’.
“Ky arrestim i deputetëve të Lëvizjes erdhi me urdhër të kryepolicit Kadri Veseli për të liruar sallën e Kuvendit të Republikës që dje kishte për qëllim faljen e territorit, legjitimin e tradhtisë së Thaçit, e të gjitha këto me ndihmën e kryeministrit Haradinaj”, thuhet në deklaratë.
Deputetët që u arrestuan dhe u larguan dhunshëm nga salla e Kuvendit ende po vazhdojnë të mbahen në paraburgim: Arbërie Nagavci, Drita Millaku, Fitore Pacolli, Liburn Aliu, Valon Ramadani, Salih Zyba dhe Xhelal Sveçla.
