Deputeti i LDK-së, dhe anëtari i Komisionit për Arsim, Fidan Rekaliu, ka kritikuar qeverinë Haradinaj, për siç tha ai degradimin e arsimit në Kosovë, duke e shkarkuar bordin e Agjensionit për Akreditim.
Ai akuzoi kryeministrin Haradinaj se ka bërë nxitjen e shkarkimit të këtij bordi.
Rekaliu, në fjalimin e tij në seancën e jashtzakonshme të Kuvendit, lidhur me përjashtimin e Kosovës nga AQAR, tha se situata e arsimit ka qenë më e mirë në vitet 1990-1999, se që është tani.
“Kryeministri i vendit me nxitjen e bërë për të shkarkuar bordin e mëparshëm të agjencionit për akreditim ka shkaktuar këtë situatë që dëmton edhe më tej imazhin e universiteteve tona. Prandaj, i njëjti duhet të jap përgjegjësi për këtë situatë të krijuar. Është obligim që e kemi ndaj një sistemi arsimor i cili duket se ka funksionuar më mirë në periudhën 1990-1999 sesa tash. Duket që kjo qeveri nuk po lehteson aspak problemet qe vendi ka, përkundrazi, ajo po është shkaktari i shumicës prej tyre“, ka thënë Rekaliu.
Ai ka kërkuar nga deputetët e Kuvendit, që mos të lejojën përfundimin e kësaj seance, pa arritjen e rezultateve konkrete, përshkak se sipas tij, Kuvendi e ka obligim një gjë të tillë.
“Dua të besoj, madje shpresoj shumë, që secili deputet në këtë Kuvend, i pozitës a i opozitës, do të jetë në lartësinë e detyrës politike përfaqësuese e qytetare për t’u bashkuar për të mirën e rinisë dhe të vendit, që të mos lejojnë të përfundojë kjo seancë pa rezultate konkrete. Ky Kuvend mund dhe duhet të veprojë sot. E ka detyrim të veprojë. Mos harroni, është në nderin e Kuvendit të Republikës së Kosovës, të ushtrojë përgjegjësitë e tij kushtetuese në mbikqyrjen dhe korrektimin e Qeverisë, jashtë cdo interesi të ngushtë partiak që ndërlidhet me marrëveshjet për të mbajtur pushtetin si qëllim më vete, sot kur bëhet fjalë për një çështje si kjo“, ka thënë Rekaliu.