Mediat serbe shkruajnë se vazhdimi i dialogut ndërmjet Kosovës dhe Serbisë në nivelin më të lartë nuk është në horizont as gjatë janarit, edhe pse nga kabineti i Federica Mogherinit po bëhen përpjekje që datën për raundin e ri ta caktojnë deri në fund të muajit të parë të vitit që po vjen.
Sipas gazetës serbe "Novosti", pengesa kryesore që të vazhdojnë bisedimet, është insistimi i Kosovës që në to të përfshihet edhe SHBA-ja, për ç’gjë nuk ka pajtim në Bruksel.
Nëse do të ketë përpjekje që formati i dialogut të shkojë në këtë drejtim, nga Beogradi tashmë është paralajmëruar se do të kërkohet pjesëmarrja e përfaqësuesit të Rusisë, e për këtë sinjalin e gjelbër e ka dhënë në javën e shkuar presidenti rus, Vladimir Putin, gjatë takimit me presidentin serb, Aleksandar Vuçiq.
I pari i Serbisë, siç citohet, ka thënë se “vazhdimi i dialogut i lidhur me pjesëmarrësit, do të jetë ashtu siç thotë Serbia, sepse ajo ofron kompromis“.
Në Bruksel është thënë shkurtimisht se “puna në fazën e re të dialogut për normalizimin e gjithanshëm të marrëdhënieve ndërmjet Serbisë e Kosovës po vazhdon".