Presidenti i vendit, Hashim Thaçi, për herë të parë sot u tregua i ashpër ndaj themelimit të Gjykatës Speciale, duke thënë madje se kjo gjykatë ju imponua Kosovës për ta kënaqur Serbinë e Rusinë.
Presidenti nuk u ndal me kaq, por tha se ai kishte vendosur ta udhëheqte një proces të padrejtë për Kosovën, ndërkohë shtoi se Kosova u mashtrua nga ndërkombëtarët pasi, siç tha ai, ata dhanë premtime në kambim të Speciales, por që asnjë nuk u realizua.
E, pas këtyne akuzave të Presidentit, ka folur shefja e njësisë së informacionit në Dhomat e Specializuara të Gjykatës Speciale, Avis Benes.
Ajo nuk u mor direkt më fjalët e Thaçit, por bëri të ditur se Dhomat e Specializuara kanë mandatin për të kryer gjykim të drejtë në një proces të rregullt, duke lënë të nënkuptohet se nuk kanë ndikuar ndonjë nga faktorët e tjerë që i përmendi Thaçi.
“Prokuroria Speciale janë ata që hetojnë dhe duhet të ngrenë akuza dhe ne, nga ana jonë, në Dhomat e Specializuara të Kosovës, kemi mandatin për të kryer një gjykim të drejtë dhe për t’u siguruar që ka një proces të rregullt. Dhe, që të gjitha aspektet e proceseve gjyqësore po vendosen dhe se ka një gjyq të sigurt, të pavarur dhe të paanshëm. Gjithashtu, për t’u marrë me pjesëmarrjen e viktimave dhe aspektet e tjera…Një gjë që unë dua të theksoj është se ne jemi një Gjykatë e ligjit dhe mandati ynë është një gjykim i drejtë, në thelb, mandati është që të informojmë, të informojmë objektivisht se çka po ndodh dhe të sigurojmë të gjithë informacionin në lidhje me procedurën dhe të ofrojmë informacionin aktual”, ka thënë Benes.
