Partia Ekologjike e Kosovës (PEK) përmes një deklarate për media ka shprehur pakënaqësinë e saj me zvarritjen e formimit të institucioneve të dala nga 11 qershori dhe kërkon që një gjë e tillë të bëhet sa më shpejt, në mënyrë që Kosova të përshpejtojë në rrugën e saj drejt integrimeve evropiane.
Duke përkujtuar se zhvillimet e fundit po e thellojnë krizën politike në Kosovë, PEK i konsideron të papranueshme veprimet e partive politike, pasi që ato me veprimet e tyre po shkaktojnë bllokime dhe sjelljet e tilla janë shqetësuese dhe të papranueshme.
“Veprimet për bllokimin e themelimit të institucioneve nuk janë në interes të Kosovës dhe qytetarëve të saj. Gjendja e krijuar tregon mungesën e përgjegjësisë politike të subjekteve politike ndaj qytetarëve të Kosovës dhe ndaj faktorit ndërkombëtar”, thuhet në deklaratë.
Partia Ekologjike e Kosovës bën thirrje që në seancën e radhës më 24 gusht deputetët e të gjitha partive ta ndërtojnë konsensusin politik dhe të votojnë për kandidatët, dhe mos të lejojnë bllokimin e themelimit të institucioneve të reja.
“Kosova ka nevojë për një shtet funksional i udhëhequr nga një elitë që do të sigurojë dalje nga qorrsokaku, veproi në interes të popullit dhe të shpejtoj anëtarësimin e Kosovës në Bashkimin Evropian”, thuhet në deklaratën e kryetarit të PEK-ut, Arif Krasniqi.
