Ministri i Forcës së Sigurisë të Kosovës, Haki Demolli, priti të enjten ambasadorin jo-rezident të Kanadasë në vendin tonë, Daniel Maksymiuk, me të cilin bisedoi për marrëdhëniet e mira ndërmjet dy vendeve, me theks të veçantë për bashkëpunimin e mirë ndërmjet dy ministrive të Mbrojtjes.
Demolli falënderoi diplomatin kanadez për përkrahjen që Kanadaja dhe Ministria e saj e Mbrojtjes po japin për MSK-në, si dhe e njoftoi ambasadorin me zhvillimet e përgjithshme në FSK dhe me zhvillimet rreth projektligjit për FSK-në.
Në takim u fol edhe për mundësitë e bashkëpunimit jo vetëm ndërmjet FSK-së dhe Forcave të Armatosura të Kanadasë, por edhe në fusha tjera përkatëse në nivel vendi.
Nga ana e tij, ambasadori Daniel Maksymiuk premtoi se do të angazhohet për thellimin e bashkëpunimin ndërmjet Kosovës dhe Kanadasë edhe në fusha tjera, dhe në këtë kontekst edhe në mes FSK-së dhe Forcave të Armatosura të Kanadasë.
