(E plotësuar) - Ka përfunduar seanca gjyqësore kundër ish kryeministrit të Kosovës, Ramush Haradinaj.
Gjatë kësaj seance e cila është mbajtur në Colmar të Francës, është prezantuar dosja e Prokurorisë së Beogradit për Krime Lufte.
Avokati mbrojtës i Ramush Haradinajt, Arianit Koci, përmes Facebookut ka njoftuar se klienti i tij ka pranuar lëndën të cilën e ka quajtur të sajuar dhe të motivuar politikisht nga ana e Serbisë,.
Koci ka bërë të ditur se seanca për shqyrtimin e lëndës ekstraduese mbahet me datën 9 Shkurt 2017.
Nis seanca gjyqësore në Francë, shqyrtohen provat e Serbisë kundër Haradinajt
Ramush Haradinajt, mbrojtjes së tij dhe Gjykatës së Colmarit në Francë, Prokuroria e Beogradit për Krime Lufte do t’ua prezantojë dosjen kundër ish-kryeministrit të Kosovës, në seancën gjyqësore që ka nisur të mërkurën në orën 11:00.
Haradinaj, sipas Prokurorisë serbe, dyshohet se ka kryer krime ndaj popullsisë civile, në qershore të 1999-s, pasi NATO kishte intervenuar në Kosovë.
Pas seancës së sotme, ku do të prezantohet dosja e Serbisë ndaj ish-komandantit të UÇK-së për Zonën e Dukagjinit, javën tjetër pritet të jepet vendimi ndaj tij dhe kërkesës së Beogradit për ekstradim në Serbi.
Kreu i AAK-së ndodhet në Francë, i liruar me kusht, pasi u arrestua në aeroportin e Bazelit, më 4 janar të këtij viti, në bazë të një urdhërarresti ndërkombëtar të lëshuar nga Serbia nga viti 2004.
