Policia e Kosovës njofton se pas lirimit nga paraburgimi të nënkolonelit Nehat Thaçi, i njëjti do të vazhdojë punët dhe detyrat në kuadër të Policisë së Kosovës, duke qenë i përkushtuar dhe profesional në përmbushjen e të gjitha objektivave në të mirë të rendit, ligjit dhe sigurisë publike.
“Në asnjë rast arrestimi i tij nga ana e autoriteteve serbe nuk do të ndikojë në motivimin, profesionalizmin dhe përkushtimin e tij për t’iu shërbyer të gjithë qytetarëve të vendit pa dallim, duke përfshirë edhe komunitetin serb”, thuhet në komunikatën e Policisë së Kosovës.
Drejtori i Policisë për rajonin e Mitrovicës është liruar të martën nga burgu i Nishit pas më shumë se një muaj arrestimi nga ana e Policisë serbe.
Thaçi akuzohej nga Gjykata e Nishit për krime lufte gjatë vitit 1999. Ai është liruar pasi që nuk janë gjetur prova se ai ka kryer këto krime.