Janë dy alternativa për mbajtjen e zgjedhjeve të parakohshme. Nëse koalicioni qeveritar humb fuqinë në Kuvend dhe nëse liderët e dy partive më të mëdha në pushtet bëjnë marrëveshje.
Kështu tha sot presidenti i Kosovës Hashim Thaçi pas homazheve që bëri te vendi i rënies i dy heronjve të kombit Afrim Zhitia dhe Fahri Fazliu në Prishtinë.
I pyetur nga gazetarët nëse vendi do të shkojë në zgjedhje të parakohshme Thaçi fillimisht nuk ka dashur të komentojë deklaratat e liderëve politik, mirëpo megjithatë sipas tij në zgjedhje mund të shkohet vetëm nëse paritë e koalicionit qeverisës e humbin fuqinë e tyre në Kuvend apo edhe në rast se ata merren vesh për një gjë të tillë.
“Unë nuk i komentoj deklaratat e asnjë lideri politik, aktualisht nga ajo që shoh dhe kuptoj mazhoranca ka një fuqi edhe në numër edhe fuqi politike dhe shoh që është një mirëfunksionim i institucioneve. Por çdo rrethanë në zgjedhje mund të shkohet vetëm në dy mënyra. E para nëse edhe kjo mazhorancë e humb do të thotë fuqinë e Kuvendit të Republikës se së Kosovës, apo në rast të marrëveshjeve të tyre. Unë si President jam i obliguar të kryej obligimet e mia kushtetuese dhe ligjor, por diçka të tillë askush nuk është drejtuar në zyrën time as nga partnerët e koalicionit e as të partive tjera”, tha Thaçi.
Ndërkohë i pari i vendit ka treguar se një kërkesë për zgjedhje nuk i është drejtuar atij as nga partitë e koalicionit qeverisë e as të partive të opozitës.
Data e vetme për zgjedhje, sipas presidentit Thaçi do të jetë caktimi i datës për zgjedhjet për kryetar të Drenasit.