Shala mohon se ka gisht në zhdukjen e 450 fletvotimeve në Runik

Aktuale

Shala mohon se ka gisht në zhdukjen e 450 fletvotimeve në Runik

Më: 1 nëntor 2019 Në ora: 23:13
Foto ilustrim

Alban Shala, kryesues i vendvotimit ku u zhdukën 450 fletëvotime në Runik të Skenderajt, ka rrëfyer për gjithë atë që ka ndodhur mesditën e 6 tetorit.

Shala, që vjen nga AAK –ja, mohon të ketë qenë i pranishëm në klasë në momentin kur u morën fletëvotimet e zbrazëta dhe u nxorën nga aty.

Sipas tij, qëllimisht, dikush e shfrytëzoi mungesës e tij sa ishte në pauzë dhe kur ishte kthyer ai ishte njoftuar se aty mungonin fletëvotimet.

Në atë çast, Shala thotë se kishte kontrolluar klasën, por nuk i kishte gjetur fletëvotimet, ndërsa për këtë e kishte njoftuar menaxherin dhe më pas edhe Policinë.

Pafajësinë e tij thotë se do ta vërtetojnë provat e kamerave që ishin të instaluara në klasë dhe të cilat i ka Policia.

Derisa ndihet i pafajshëm në gjithë këtë situatë, duke thënë se me përgjegjësi kishte kryer punën e tij dhe nuk ka punuar në favor të asnjë kandidati, në këtë rast as për Bekë Berishën.

Lidhur me këtë rast, Policia dhe Prokuroria janë duke i vazhduar hetimet, me ç’rast janë intervistuar disa persona të cilët dyshohet se kanë kryer veprën penale “Asgjësim i dokumenteve të votimit”.

Deri tani, për këtë rast nuk ka ndonjë kallëzim penal e as nuk është arrestuar asnjë person i dyshimtë.

Të enjten, Ktv ka raportuar bazuar nga burime brenda AAK –së, se Alban Shala dyshohej se ishte planifikuesi i krejt kësaj ngjarjeje dhe me këtë veprim synonte të siguronte vota për kandidatin për deputet Bekë Berisha, pretendime këto që i ka mohuar ky i fundit.

commentFirst article
Sot mund të lexoni Shfletoni kopertinat